話咁快就一年一度嘅明星賽，不過今年侯斯頓分分鐘變咗「籃球之神」主場；因為下周日（17日）明星賽正日，撞正米高佐敦嘅50大壽，加上兩軍陣容入面有唔少球星隸屬「飛人牌」，今次仲唔趁呢個好機會幫老頂賀壽咩！就連《運動畫刊》都乘機推出佐敦「50特集」，真正係星光熠熠賀波神。
雖然呢期勒邦占士風頭好勁，仲喺fb同twitter話自己唔係MJ，係LJ。不過佢得一隻指環咁大把，個人數據就算幾勁，要追上米高佐敦都真係要加好多把勁先得。早排佐敦嘅北卡大師弟占美臣，已經公開造勢，話就算MJ去到50歲，復出打NBA要攞雙位數得分，都唔係咩難事。
去到今次侯斯頓明星賽，就算安東尼剛喺周三對速龍嘅比賽整親右手，有機會缺陣，都仲有正選比歷克格芬、基斯保羅，同埋後備嘅韋斯卜克，係「飛人牌」旗下；趁今次喺正「籃球之神」生日比賽，一眾NBA球星名宿又會出席，話唔定會叫即將退休嘅總裁史坦捧個蛋糕出嚟，齊齊唱《I believe I can fly》當生日歌，真係諗起都溫馨。而佐敦賀完生日，到4月27日又會同耶維蒂（Yvette Prieto）拉埋天窗迎第二春，雙喜臨門之下，話唔定佢隊山貓都會戰績反彈，唔使聯盟墊底咁慘喎。
《運動畫刊》出特集賀壽
喺咁重要嘅日子，唔少美國傳媒都趁呢個機會，推出佐敦特集。《運動畫刊》就好有心，以佐敦88年贏入樽賽嘅相，配上「50」大字，做新一期《MJ 50特集》嘅封面。入面除咗有歷來50大MJ封面（連埋今期剛好50個），仲列埋50個永不會忘記MJ嘅理由，加上88年入樽賽秘聞，肯定成為MJ迷必儲神物。特集將會喺美國時間下周一（18日）面世，到時真係要搶購喇！