碧咸首披巴黎聖日耳門戰衣落場比賽嘅日子越嚟越近嘞，咸哥喺星期二同新隊友打氣親身見證喺歐聯贏波之後，喺周三就首次隨隊跟操，仲着住對非常搶眼嘅粉紅色波砵，聽講話係佢囡囡哈七鍾意喎。
37歲嘅碧咸喺上個月尾加盟巴黎聖日耳門，但冇即刻就去新球會報到，留喺英格蘭處理埋啲事務，到日前先至會合。聖日耳門喺周二歐聯16強作客擊敗華倫西亞，有去睇波嘅碧咸，同聖日耳門職球員一齊由西班牙返去法國，第2日就展開佢喺新東家嘅第一次操練。
操練左飛右鏟唔錫力
碧咸態度專業就眾所周知，佢喺操練嗰陣非常認真，左飛右鏟唔錫力，但最搶眼嘅應該係佢對粉紅色波砵。聽講用呢隻色嘅靈感係源自碧咸囡囡哈七Harper Seven，話佢好鍾意粉紅色咁話。
巴黎聖日耳門會喺周日法甲作客索察，可能球迷都收到風，碧咸有機會喺呢場波亮相，啲波飛𠵱家已經賣晒，連傳媒採訪位都爭崩頭。之但係碧咸𠵱家都未操起最佳狀態，係咪真係會喺周日披甲都仲未百分百確定，反而等多一星期對馬賽嘅大戰，碧咸會上陣就更加穩陣。另外，喺歐聯拎紅牌嘅伊巴謙莫域，要接受歐洲足協紀律聆訊，隨時唔只停一場。