沙田鄉事委員會噚日舉行新春團拜，由於年初二喺車公廟為沙田求到支上籤，所以在場人士心情大好，但鄉委會主席莫錦貴致辭時，不忘引用鄉議局主席劉皇發為香港求嗰支下籤，叮囑大家防範小人，仲不點名話呀，喺新界村屋僭建申報問題上，「我哋都遇到小人『整蠱作怪』，煽動村民唔好申報」。
莫錦貴所講嘅小人係邊個？相信大家心中有數。如果諗唔到，八方可以畀貼士，屯門鄉委會主席何君堯早前呼籲僭建業主唔好申報，仲帶成近百村民衝擊鄉議局囉。講開車公廟，沙田鄉委會擬就政府侵犯車公廟業權入稟告政府，莫錦貴話已經搵咗律師研究，相信有一定勝算。