發展局政治助理何建宗（上圖），原來係物業王。據佢向政府提交嘅利益申報顯示，除咗同太太喺灣仔嘅自住單位外，手持物業遍佈港九新界，例如灣仔有舖位出租、深水埗則有兩個單位連車位，沙田亦有個住宅連車位。最勁係遠至北京都有層樓出租，身家好雄厚。
今年27歲嘅教育局政治助理施俊輝亦唔執輸，同屋企人夾份喺沙田買咗層樓。
相比之下，做咗立法會議員多年、一輸就去做政制及內地事務局副局長嘅劉江華、政務官出身嘅教育局副局長楊潤雄以及傳媒出身嘅財爺政助羅永聰，明顯比下去，事關佢哋喺物業申報嗰欄，一片空白喎。返咗工成兩、三個月嘅食衞局副局長陳肇始同政助陳凱欣，暫時仲未見到佢哋嘅利益申報，兩位女士會唔會禾稈冚珍珠？八方拭目以待。