同楊思琦甩拖後嘅李泳豪，一直專心事業，不過噚日忽然有報道指豪仔離奇地有個兩歲嘅女，仲影到豪爸鼎爺李家鼎幫手湊孫，見鼎爺抱住個B女手勢純熟，而阿B女又好跟佢，一啲都唔抗拒，唔通豪仔真係秘密有個女？
馮仁昭噚日打電話問過鼎爺，鼎爺忍唔住話：「大仔泳漢就未有拍拖，細仔泳豪就甩咗拖，我點會有孫呀？」
承認有淵源
不過鼎爺承認B女同佢有啲淵源，佢話：「B女係我學生個女，B女爸爸係豪仔嘅中學同學，我哋成日見面，B女咪好跟我囉。」咁豪仔恨唔恨拍拖生B呢？鼎爺有少少激動咁話：「恨都冇用，有B就帶出嚟騎膊馬俾你哋影，呢隻死貓好難啃囉！」鼎爺今次已經冇乜火氣，問到怕唔怕俾人誤會佢抱嘅係思琦個女，鼎爺就話：「唔會！呢個大過思琦個女。」
之後豪仔喺微博度忍唔住大鬧黐線，仲話俾人屈得多，但屈佢有個女都係第一次，又爆粗鬧呢單嘢「好X流」！
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/