唔敢話全部，但對於唔少形單隻影嘅男女，情人節最怕就係見到街上成雙成對，盡量搵地方避浪漫風暴，政界都有唔少單身貴族等待愛，當中唔少人以戲院做避難所kill time，有人就過大海去澳門兩日一夜，單身對抗全城甜蜜時空。
講剩女，點可以唔提陳淑莊。講過有普選先會結婚嘅Tanya，兩年幾前同男友分手後回復單身，至今未有着落。
Tanya睇三粒鐘《雲圖》
Tanya噚日一支公去睇片長三粒鐘嘅《雲圖》，話套戲好好睇，全院孖公仔都冇所謂，仲坐咗喺兩對情侶中間：「當平常日子咁過就得㗎啦，做人最緊要happy。」
晚飯就一行10人去食韓燒。幾時搵個伴？40歲嘅Tanya話，等佢完成咗啲暫未可透露嘅短期目標先啦。
同樣想搵個男友嘅慢必陳志全，噚日都係單拖入戲院，睇《西遊》：「一個人實買到飛！」41歲嘅慢必話急於搵另一半㗎，所以呼籲對佢有意思嘅人，即管send個profile、facebook畀佢睇睇喎。
剩女唔入戲院，仲有乜做？工聯會麥美娟就選擇外遊，啱啱先喺新加坡探完屋企人嘅佢，噚日又同班朋友過大海度假，講明搵另一半唔係首要工作，「𠵱家最緊要係爭取標準工時立法」。講到政界超級剩女，真係非嫻姐莫屬；學佢嘅黨友話齋，嫻姐已經嫁咗畀工運，仲有心機尋覓愛咩。
mailto:[email protected]