鄉議局主席劉皇發喺車公廟幫香港求咗支下籤，唔少政界中人私下開盤，估吓車公口中嘅小人係邊個？邊個梁班子成員最快赤腳返回廬？有民主黨中人就開盤，話最快落台嗰個係教育局局長吳得掂，至於最多人想落台嘅狼英，就可能係最有機會賴死唔使走。
咪以為民主黨有乜神仙指引，查實佢哋係從「高官落台魚蝦蟹」睇到端倪。話說喺維園年宵負責看檔賣此創意年宵產品嘅民主黨人，都話唔少市民喺檔口擲骰試玩時，最多人擲中吳得掂要落台；有幸見證呢個「卜卦」嘅張文光話呀，唔少人埋嚟都話想擲狼英，點知開極都係吳得掂，其次就係邵善波，仲要不時開雙，熱到爆。羅范椒芬同劉江華分別排第三、四位，狼英同謬波嘅命中率就好低，睇嚟佢哋兩個真係好鬼命硬喎。