【銅鑼灣】陳慧琳（Kelly）老公劉建浩（Alex）日前晚上7點半，喺銅鑼灣嘅南北樓約咗成班朋友食飯，咁啱呢日Kelly返咗內地演出，Alex就變身做湊仔公，帶咗細仔小龍包出席飯局，下月就滿1歲嘅小龍包肥嘟嘟好可愛。
個樣似足鄭則士嘅小龍包，雖然係男仔但頭髮長長，仲要用髮夾夾起頭髮，加上着住件紅色冷衫仔，睇落真係有啲似女仔，好鬼得意，似乎Kelly真係恨女恨到發燒噃！活潑可愛嘅小龍包大受歡迎，不停被同枱嘅叔叔逗玩，其間唔知係咪扭計，要傭人抱佢出門口周圍行。
肉緊啜囝囝
而煙癮大發嘅Alex，成餐飯出咗門外三次煲煙，有次仲即買即食㖭，好在佢都識得避開囝囝，Alex不停出出入入，唔係扯煙就係傾電話，有次佢傾完電話，咁啱小龍包俾傭人抱出門口，Alex好肉緊咁攬住囝囝啜咗一啖，之後佢發現記者，就即刻埋單走人。
採訪、攝影：李志明、朱志聰、羅德光
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/