【本報訊】16歲便初戀，卻至42歲才結婚，有政壇元秋之稱、民建聯蔣麗芸帶笑自嘲：「（估不到）四張嘢都有人排山倒海咁追求。」遂在97年下嫁梁海明。丈夫不浪漫，蔣麗芸幾次遭到冷水照頭淋；情人節，她教路天下人妻，中年男人面對妙齡少女，難免心花怒放；女人必須放下醋埕，打造安樂窩，令男人，愛回家。
記者：許偉賢
別以為只有男人「冇心肝」，曾為特首梁振英隱瞞僭建花棚挺身疾呼：「好多男人呀，連自己結婚紀念日呀，都記得唔清楚啦！」的蔣麗芸，連丈夫梁海明的生日也忘記，「第二日佢（梁）見到我、對住我唱生日歌：Happy birthday to me，Happy birthday to me……我話，Oh my god……佢話：我噚日生咗日嘞，我先即刻叫工人煮碗麵佢食」。
並非怕做剩女而結婚
今年58歲的蔣麗芸，與梁海明拍拖兩個月即訂婚，97年12月20日註冊結婚。蔣麗芸笑稱當年非為怕做「剩女」而結婚，只是被對方誠意打動，估不到「四張嘢都有人排山倒海咁追求」。
回想訂婚過程，蔣麗芸仍甜絲絲、笑在心：「訂婚時，佢去到賣jewelry嗰度任我揀；雖然佢已經望實我……佢始終係個打工仔，但我都揀咗個中間（價錢）咁啦、頗大粒（鑽石）啦、佢afford到嘅戒指。」
工程出身的梁海明不浪漫，偏偏蔣麗芸是感性的人，她的浪漫舉動不時被冷水照頭淋。「有次我突然間好開心咁買咗自己好鍾意食嘅嘢，喺屋企個花園好似野餐咁，擺晒蠟燭喺地，老公返到嚟就話『喂，係咁樣會火燭㗎，快啲吹熄佢』，我惟有話『得嘞，遲啲先啦，食埋嘢先算』」；另一次，「我喺度播緊啲好輕鬆、有情調嘅音樂，佢（竟然）同我講：『今日見到肥佬張喎』……」
「夫妻間首要是信任」
踏入第16個結婚紀念日，蔣麗芸強調夫妻間首要是信任：「婚姻一定要畀到對方足夠空間，一定要有信心，唔好下下疑心去諗：老公夜咗返嚟，係咪講大話呢？佢會唔會喺寫字同個女同事好好傾呢？假如開始咁諗，就係破壞婚姻嘅trigger point。」
她指自己好open，不會check老公電話紀錄與短訊，「盡管好多人會話：『嘩，你睇住喎，你先生啲同學會呀、參加啲乜會呀，同裏面好多女仔好好傾喎。』」
「我可以imagine到，一個上咗年齡嘅男士，去到一個party，有好多後生女同佢講笑、嘻嘻哈哈，其實佢心情好輕鬆、佢係好開心；但有一樣嘢我好有信心，就係無論佢喺外面幾放鬆、幾開心，但之後佢會更眷戀屋企，佢會當屋企係佢嘅shelter、佢會喺度搵到peace。作為女性，一定要畀個安樂窩（丈夫）。」假若老婆已經做足本份，老公依然流連忘返，蔣麗芸也有解脫之道：set him free。