中門大開:神手發叔 - 添馬男

中門大開:神手發叔 - 添馬男

新正頭人人都鍾意聽啲吉利說話,偏偏劉皇發就去為香港求咗支下籤,以梁粉一貫陰謀論及鬥爭思維,劉皇發應係包藏禍心,表面服從梁特首,暗中為唐營服務,將籤筒全部換成下籤,凡求必中,而且仲要全部一式一樣,係95號下籤,籤文是「駟馬高車出遠途,今朝赤腳返回廬,莫非不第人還井,亦似經營乏本歸。」

有人話劉手臭,我就話佢好靈。舊年又係佢求,求得第29籤中籤,籤文為︰「何為邪鬼何為神,神鬼如何兩不分,但管信邪修正外,何愁天地不知聞。」神鬼如何兩不分?係神係鬼邊個知,一場特首選舉,佢一手栽培之林鄭月娥,同振英夾計操作僭建議題,打殘唐英年,瓜分了特區兩大高位,你話佢係人定係鬼?

新一年恐怕赤腳返歸

振英當選前,吹水唔抹嘴,一時又話前朝蹉跎歲月,要用香港速度解決住屋問題,一時又話徹底解決貧富差距,當時香港人俾佢點到頭暈,以為佢好掂,好似讀書人上京赴考,大大聲話一定會高中,誰知醜婦終需見家翁,唔單止當初承諾一切落空,仲要赤腳手fing fing回來,名落孫山,老本都冇晒。
籤文寓意好清楚,就係香港會一鋪輸清,正如赴考落第及做生意本錢都蝕光。劉皇發當然唔敢講到咁盡,將負面調子降低,亂噏一通賴話有小人云云。
呢個輸老本古仔,在董建華時期已經發生過,佢認為香港要發圍,一味吹水假大空,搞高科技產業,結果轉型未成,公共財政赤字連連,要削薪減人手資源增值,人人怨聲載道。
振英係建華二世,老董扶佢上去要完成佢大志,所以必定會走回老董舊路。通過經發會、金發局,搞出大小空想藍圖,將政府資源及心思扯晒去做無謂嘢,外圍有乜變動,就冚包散。
建華之亂,新一年將會再起,香港人真係「赤腳返歸」。

添馬男