民建聯劉江華為做副局長，不惜辭去沙田田心區議員，觸發一場名副其實浪費公帑嘅補選喺3月10日舉行。有網民發現其中一名候選人蘇佩琳零舍騎呢，用咗張頭同頸都戴滿珍珠嘅相做海報，忍唔住寸阿蘇小姐唔知選緊區議員定係選美。
原來蘇小姐上載唔少藝人支持嘅片段上網，包括魯芬BB，但魯芬BB喺短片中講唔出蘇小姐過去喺田心有乜政績，只係話自己特登由元朗去田心撐老友；新城《恐怖熱線》主持人趙嘉寶都話係蘇小姐朋友，仲喺1月25日喺facebook話趁嗰日係田心補選落去打氣㖭。
同樣參加補選嘅民主黨丁士元憶述，09年喺卿姐辦事處幫田心居民做嘢幾年來，唔覺蘇小姐有蒲頭喎；事實上蘇小姐報稱主席嘅新青年民主幹線，過往亦唔覺有乜搞作。