歐陽震華（Bobby）大前日開P團拜，有傳酗酒出事，凌晨被送往律敦治醫院ICU搶救，經理人Lydia澄清只是急促進食嗆喉導致急性肺炎，昨日情況好轉，其妻傅潔嫻現身醫院時表示Bobby反安慰她不用驚。Bobby孭飛的無綫新劇《情逆三世緣》受影響，可能隨時停工。
現年52歲的師奶殺手歐陽震華，大前日年初二與陶大宇、謝天華等到友人家狂歡暢飲，Bobby前日凌晨突然昏迷被白車送往灣仔律敦治醫院，在深切治療部（ICU）插喉留醫，其經理人Lydia表示Bobby因急促進食嗆喉導致急性肺炎。Bobby太太、澳門前賭王傅老榕孫女傅潔嫻前日探望夫婿時眼紅紅，但Bobby經醫生搶救後情況好轉，傅潔嫻昨日現身醫院時已再現歡顏。
「佢叫我唔使驚」
有讀者昨日報料指Bobby出事時正在好友Ben Chan家開P，突然發生意外嚇壞朋友，Lydia前日否認他是飲酒出事，Lydia昨午一時多再陪傅潔嫻到ICU探Bobby時說：「佢今日比噚日好好多，識得講嘢，幾時轉普通病房要等醫生通知。」
Bobby大步檻過，傅潔嫻也說：「佢精神好好多，唔可以食嘢，要吊鹽水，佢叫我唔使驚。」雖然朋友想探望Bobby，但遭其家人婉拒，傅潔嫻說：「朋友都話嚟，我話遲啲先，佢喺ICU唔係咁方便，我諗好快醫生可以安排轉普通病房。」眼佈紅筋的傅潔嫻昨午五時多再到醫院，Lydia代答：「Bobby要留多日ICU，佢食咗藥有啲攰，出晒鬚根。」Bobby可會戒酒？Lydia說：「唔關酒事，係有菌入咗肺。」
新劇隨時被抽起
無綫劇《情逆三世緣》監製莊偉建，昨日在電話中被問到今日是否繼續開工時說：「抽其他戲份拍住先，就算佢（指Bobby）出院都等佢休息吓先。」莊偉建透露《情》劇拍了三分二，原定下月5日出發到佛山拍外景，不過隨時有機會抽起劇集不拍：「要抽起都唔定，等聽日（指今日）返公司開會先有決定。」
《情》劇女主角關詠荷今日繼續開工，她在電話中說：「照開工，話搵替身代Bobby拍，如果拍攝期要延長，我配合到，最緊要Bobby冇事行返出嚟。」
採訪：楊潔雯、譚倩宜
攝影：陳俊強
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/