碧咸加盟咗PSG，但到𠵱家都未正式披甲，周二場歐聯都唔例外，但就有隨隊去西班牙睇波打氣。着住老西嘅碧咸坐喺球會高層兼老友李安納度隔籬，睇波睇到鬼咁肉緊，表情多多；球隊失機嗰陣就仰天長嘆，到入波就企埋起身振臂高呼。其實碧咸迷都唔使等太耐，就會見到佢正式落場。據教練安察洛堤講，預計碧咸會喺月尾主場迎戰馬賽嘅法甲大戰上陣。
安歷卡「6度」打歐聯
叫安歷卡做「足球浪人」一啲都冇錯，呢位法國老將喺1月加盟祖雲達斯，到周二終於首次亮相；喺完場前4分鐘大局已定時後備入替。由十幾歲𡃁仔首次代表巴黎聖日耳門上陣，喺安歷卡呢十幾年職業生涯裏面，祖雲達斯已經係佢第10間球會；佢亦有代表當中6隊波出戰歐聯，平咗伊巴謙莫域嘅紀錄。
罪人岩布斯有錢有地
周日幫尼日利亞贏咗非國盃嘅守將伊菲岩布斯返咗蘇格蘭後，前日即刻喺歐聯幫些路迪打16強；唔知係咪太攰，球隊失嗰3球有兩球都關佢事，賽後仲俾隊友甘文斯怨。但伊菲岩布斯亦收到喜訊，就係瓜分由尼日利亞政府畀嘅420萬美金（約3,270萬港元）非國盃冠軍獎金，計落每個球員有成32,000美金㗎。除咗錢，職球員仲可以喺首都阿布賈攞到一塊地，和味咯。