新年兼情人節，祝大家股運亨通，愛情事業兩得意。初三晚，菲菲同朋友去深水埗掃街，每年大年初一至初三，食環署對小販一向會通融啲，於是呢幾日桂林街一帶都會排檔湧現。光顧無牌熟食小販當然唔鼓勵，但香港人嘛，硬係覺得街邊嘢係好食啲。
不過今年食環反傳統揸正嚟做大冚檔，令唔少老饗不滿。食環作為執法機關，唔告係人情，告係道理，但事件反映港式風味已經被天價租金逼埋牆角。香港旺區舖位租金全球最貴，小食店唔止加價，篤串魚蛋都話要最低消費；茶餐廳要生存，就要升呢做「翠華（1314）式」高檔茶仔。港式小食店同茶餐廳可愛之處係抵食嘛，行貴價路線反顯得不淪不類。
𠵱家由旺區到新界北，一早已成為「為人民幣服務」商戶嘅天堂，相反落地生根嘅港人越嚟越被邊緣化。聽講今年特別多人去深水埗掃街，相信係大家知道天價租金下，要一嚐「抵食又好味」嘅真正港式風味，一年就只有呢一次機會。
Fifi
本欄逢周二、四刊出