可能今年情人節撞正年初五，新年氣氛甚濃，搞到冇乜情人節氣氛，一班財金界股佬今年亦冇特別搞作。
好似獨立股評人、最近搞緊單大刁嘅黃偉康同華華講，要繼續同新證券行「天瑪仕國際」執頭執尾好忙喎，「今年情人節真係冇時間安排，可能食餐晚飯啦。」
交行香港分行首席經濟及策略師羅家聰就講明，結咗婚七、八年，情人節基本係「三冇」，冇紀念、冇禮物、冇特別。好彩佢話老婆唔會詐型，話「兩夫婦奉行『實用主義』，晚飯都冇加餸。」
反而生完龍女冇耐嘅法巴上市衍生產品部董事郭小菱就最有心思，佢話老公要返工，今晚會親自下廚，有頭盤、主菜同甜品，仲買咗條波點領帶畀老公，都係股女最浪漫。