教宗跑馬仔未入閘已經盤口滿全球，退咗休嘅陳日君樞機靜靜雞話，以前選教宗隨時一頭半個月，世人等白煙都等到唔耐煩，呢個時候梵蒂岡「御膳房」就會發揮關鍵力量，喺勢色唔對時，開始減少送入去畀樞機嘅食物，啲樞機肚餓咯，就自自然然快手選個教宗出嚟啦。
講開食，陳日君（圖）早兩日就大顯廚藝，親自下廚煮紅燒肉畀一班新移民家庭品嚐，呢位首席廚師仲風騷滿場飛，又飲花雕又飲白酒，中間仲溝埋鐵觀音，醉醉哋暢所欲言，講起有次去探教宗，教宗驚佢唔識路，搵咗架直升機接佢，仲搵埋意大利警察幫佢開路，令佢受寵若驚，不過最surprise係教宗請佢食Tiramisu，食到佢lam lam脷。