情人節唔係後生仔專利，老夫老妻都可以大晒幸福。舊年過檔岳少林建岳旗下麗新發展（488）做副主席嘅周福安，越撈越掂，但原來升職加薪嘅代價，係要冷落老婆大人，仲要被公開詐型。
周夫人喺會計師公會雜誌《A Plus》大爆，周福安工作大過天，連星期日都唔理佢，「成日掛住睇財經新聞，有次我諗住攬吓佢，佢竟然話：『你唔好介入我同份《金融時報》之間嘅感情！』」
周太何智慧都係會計師出身，所以明白老公真係可以好忙，平時喺電話傾偈都特別肉緊，「講吓屋企啲嘢，又或者純粹問佢：『你放工幾多點嚟接我啫？』」
雜誌仲訪問埋證監前主席方正同佢老婆方黃吉雯。方正舊年卸任證監主席，但原來佢退休之前，同身為全國政協委員嘅方太，用埋同一個辦公室。返工放工都對住，真係夠晒sweet，日日都係情人節。