蛇年首次同各位戰友見面，先祝大家蛇來運到。新春頭炮推介翠華（1314），貪佢有三大優勢。首先，翠華近月加價，奶油豬加幅達25%，唐牛日前路經牛頭角分店，午飯期間人龍起碼50人，證明加價無礙人流，更可抵銷人工及租金增幅兼推高毛利率；其次，鄰居晉佳引述朋友上海所見，翠華大受同胞歡迎，公司上市時亦講明內地市場為未來增長動力，潛力深不見底；最後就係散戶唔敢掂︰另一港產品牌米蘭站（1150）業績走樣，令翠華IPO反應冷淡，超購僅12倍，國際配售盡擸九成股份，當日股評人叫大家賺一成走人，相信散戶已掟貨，如今較招股價高逾五成，貨源盡落大戶手中。翠華上周五收3.45元，再創收市新高，可候3.40元樓下分段吸納，喺冇蟹貨情況下，博高處未算高。
P.S.上次提到遊日沽Yen策略，竟計漏簽賬折算滙價日期因素，認真抵打，多謝網友指正；如果睇淡日圓，可以將換錢日期推遲，減少蝕水機會。
唐牛