恭喜發財！樂香園喺度祝願各位讀者蛇年心想事成，「初五咁嘅樣」嘅打工仔，今年工作順利，多啲時間蛇王嘆番杯奶茶！
過往多次蛇年，香港財金界總見動盪，今年連久違了嘅車公廟下籤都現身，真係幾掃興。經紀朋友話，港股由去年底開跑咗咁耐，踏入蛇年似乎都要唞一唞先，未來幾個月大把暗湧湧緊過嚟：業績期、中國兩會出政策、美國調升債務上限到期等等。現時市場仍係較多人傾向港股未炒完，希望喺呢波暗湧中找到新藉口再挾上去，之後點？炒爆咗先算喎。
香港經濟點睇？睇落又唔係好差。海迪新春留港消費，年廿九去行花市，唔少乾貨攤檔早已賣斷貨，提早收工喺攤位內打邊爐；百合花喺最後一晚仍賣緊45蚊一支。攤販吹水時就話，今年勝在冇落雨，天氣又唔太凍，生意是近幾年來最好。不過可能正正係因為行花市嘅人多咗，區內平時插針都插唔入、專賣貴價嘢嘅大型商場，就顯得份外冷清。
或者最令人不安嘅，始終都係香港樓市。連政府出招嘅謠言都可在WhatsApp傳個滿天飛，人心不穩可想而知。不過就算政府出乜辣招，芬佬朋友異口同聲話，等調整完可再買入。所以你話，今年點到你唔擔心？
海迪