西布朗門將賓科士打喺蛇年嘅大年初二玩轉晏菲路球場！事關佢神救多球，包括救出利物浦隊長謝拉特嘅12碼，助西布朗喺英超爆冷贏2:0，繼1966/67球季後再次喺聯賽雙殺紅軍（首循環主場勝3:0），名副其實是「賓神」。相反，利記蛇年第一擊就揩嘢，認真唔老嚟。
紅軍14次中框射門冇球入
利物浦喺前晚場英超圍住西布朗嚟打，全場有成23次射門，仲14次中框，但到頭來居然一球都入唔到；原因係對手門將賓科士打上咗身，救出謝拉特、達寧及波連尼等人嘅必入波。去到77分鐘，紅軍嘅機會嚟啦，莊拿斯奧臣喺禁區內侵犯蘇亞雷斯而輸12碼；但係，操刀嘅謝四俾賓科士打捉到路，瞓身救走球12碼。利物浦咁都唔入，唔通連個天都唔鍾意佢哋？去到最後10分鐘，佢哋仲俾西布朗嘅麥奧尼及盧卡古攻破大門，輸0:2完場，繼1966/67球季後，第一次喺聯賽首、次循環都輸畀西布朗。
謝拉特對上一次射失12碼，係喺前年1月，當時利物浦喺英超作客輸畀布力般流浪1:3，累積就經已8次宴客；估唔到佢今次12碼宴客，又係連累球隊輸波。話時話，我求大俠明明記得麥師傅話過，大年初二旺8號同埋紅色，睇嚟賓科士打道氣好勁，搞到連麥師傅都頂唔住。
「謝四唔夠運啫」
西布朗全靠賓科士打神救幾球贏利物浦，結束聯賽6場不勝走勢。賓科士打就話龍門教練甸基利功勞最大：「我哋嘅龍門教練甸基利對12碼有做開研究，佢話畀我聽謝拉特成日射龍門嘅左手面，於是我照佢指示去撲嗰球12碼。」領隊奇勒話：「你唔可以話我哋靠運，我哋打得好好，絕對值得贏波。我哋喺賓科士打身上用咗400萬鎊（轉會費），呢個對我哋嚟講唔係小數目。𠵱家大家會明白，點解我哋肯畀咁多錢簽佢啦。」利物浦領隊羅渣士就話：「賓科士打證明咗佢點解可以踢曼聯同英格蘭國家隊。佢真係好勁，西布朗全靠佢先攞到分。其實我哋有好多入波機會，只可惜攻唔破佢十指關。」
談到謝四射失12碼，羅渣士咁話：「謝拉特只係唔夠運啫。」利物浦輸波之後𠵱家排第9位，羅渣士希望球員收拾心情踢好之後嘅比賽，全力爭取來屆歐霸盃入場券。聽日佢哋會喺歐霸盃32強首回合作客辛尼特，我求大俠希望佢哋可以踢番場爭氣波啦。