教宗呈辭不足一天，繼任人選已成博彩公司目標，身為115位有資格選教宗的投票人之一，香港主教湯漢樞機昨直言「未有心水」，被問到是否有意出任教宗時又笑說「我哋唔會諗呢啲嘢」；反而年過80、無權投票的榮休主教陳日君更為輕鬆，表示最希望現任梵蒂岡主教部部長、前魁北克樞機韋萊（Marc Ouellet）當選。
湯漢昨中午返回教區中心時表示，對本篤十六世辭任教宗感到突然，被問到是否有意出任教宗，他笑言︰「我哋唔會諗呢啲嘢。但我哋一切信靠天主，天主自有安排。」再被問到有沒有心水投給其他樞機時，有投票權的他笑說︰「唔知呀，等我祈禱先。」
陳日君屬意梵蒂岡主教部部長
另一邊廂，陳日君則笑言「心水」是梵蒂岡主教部部長韋萊，陳與對方在參加聖體大會時認識，二人同屬教廷禮儀及聖事部的成員，「嗰次開會佢講咗次課講恭敬聖體，講得好好呀，好叻呀呢個人，我好佩服佢，佢識好多語言，係個好開放嘅人……不過呢啲都唔係最重要，最緊要我哋有信德。」
憶述與教宗的難忘片段，陳日君想起2007年參與終身執事朝聖團到意大利東北碰運氣，嘗試與正在放暑假的教宗見面，「點知佢對我哋好好喎，唔單止畀我哋上台握手、又送念珠畀我，仲留低叫我哋食飯……我哋好開心，食完飯仲傾咗兩句。」他認為本篤十六世位至全球首牧，「啲人呢得到一個好大權嘅位置呢，就唔想落返嚟，所以自己退休，係值得我哋支持。」
民主黨創黨主席李柱銘表示，前日得知教宗辭職時感到意外和不捨，但認為其決定正確，「因為佢（教宗）呢個工作好多嘢做、好繁忙，要精神同體力支持到先可以做到，佢自己頭腦仲清醒時作出咁的決定，係好值得人敬佩」。
李柱銘又指，至今難忘2006年3月曾以天主香港區梵蒂岡觀禮團團員身份與教宗會面，「我好印象深刻，係陳日君樞機話呢個係李柱銘，一直為香港爭取民主，佢（教宗本篤十六世）就用英文回應話please continue（請繼續）」。
《蘋果》記者