初一賀歲盃初賽，5,400人入場，坐在冷清的大球場中，不禁令人懷念回憶裏的賀歲盃……。
>求學時期，初一首要節目是中午拜年𢭃利是，接着便相約三五知己到大球場排隊買飛睇「啤酒盃」。當年例邀國家隊，丹麥瑞典是常客；南韓日本是擂台躉；早年還有杜米迪斯古壓陣的羅馬尼亞、有史杜高域的南斯拉夫……，還有賽前電視廣告、報紙海報鋪天蓋地，令人覺得賀歲盃確是年度盛事。
近年啤酒商唔搞了，宣傳少了，戲碼弱了，入場球迷自然一直跌。由之前啤酒盃二、三萬人，到07年足總主辦，「只有」牙買加及中國奧運隊已被鬧爆，但都有1.4萬人；近年足總都唔搞了，降格為球會賽事，花點心機力邀小野伸二等球星，都孭到1萬飛。身邊不少朋友，甚至唔睇波的女士，年年都話新年會陪男友入場湊吓熱鬧。不過今年睇到戲碼，紛紛爆句：「點入場呀？」結果剩番5,000餘人，昔日年度盛事氣氛，已不復再。不過，仍要向南看台的港聯球迷致敬：大幅旗幟、響亮鼓聲，港聯落後一刻，正是打氣聲最大之時，實在難得！
今年由網民選出港聯名單，雖已見心思；但戲碼始終是重點。現國際球壇賽期確比以前頻密，但北歐以至亞洲如日韓都是3月開季，農曆年檔期正是這些隊伍四出集訓之時。當上月泰國泰王盃也可邀請瑞典、芬蘭參賽；去年12月東亞盃澳洲亦可派出國內球員組成的國家隊出戰，賀歲盃檔期，會否也不只可請到蒙通聯這類亞洲球會呢？
方柏翹
now足球評述員