先祝願讀者蛇年好似頭炮鴻興印刷（450）咁，「鴻」圖大展萬事「興」。鴻興9月底止2012年半年度純利，翻近半番到4512萬銀。半年結後，滙豐PMI指數連續4個月喺50樓上擴張區。工業製品瓣瓣都要都印刷包裝，製造業回暖，鴻興肯定有運行。集團更改年結日到12月底，2012年度應該只反映9個月純利，但照秤應有盈喜。鴻興9個月純利係咁意到8,000萬銀，PE已經可以由家陣51倍，大降到16倍；2013年純利上番2010、2011年1.5億銀，PE得8倍幾。又鴻興09年金融海嘯期turn around，底部配合大成交，大升3倍到近4蚊。鴻興呢轉好有當時影子，圖表派可以贒贒。唔好大貪，睇鴻興翻一番到2.90元，PE17倍，China Play成份，啱數。
保華建業後台猛
保華建業（577）變身濠賭股，剛完成近20億銀配股冇耐。城中孖沙朱太、潘政權益曝光，配股價0.65元。又同系德祥地產（199）上月尾開始買保華建業，合共1.53億股，平均價0.65元。連除息效應，保華建業由1月尾1蚊一路跌到起步位，現價得番0.62元。短打博升兩成到0.74元，對一班大孖沙嚟講，仲未啖啖肉。
錢雋