英超球隊阿仙奴喺蛇年接獲一大喜訊，就係順利送走瘟神安德里山度士，因為呢位左閘已返咗祖國巴西，完成被外借至巴甲球會甘美奧一事。
29歲嘅安德里山度士喺2011年8月以680萬鎊（約8,500萬港元）由費倫巴治加盟阿仙奴之後，表現認真麻麻，防守唔穩之餘，連巴西後衞助攻厲害呢一瓣都冇，所以一直爭唔到正選，咁耐以嚟喺聯賽只係正選上陣過13場；而佢令領隊雲格及一眾廠迷最激氣嘅地方，就係喺上年11月3日球隊以1:2不敵曼聯嘅聯賽中，喺半場時要求同由兵工廠轉會曼聯嘅前鋒尹佩斯交換球衣！你話呢種咁唔識做嘅球員，雲格係咪想佢早走早着呢？
王子：祝你前程似錦
因此，就算目前兵工廠嘅左閘基蘭基比斯因傷要休息4至6個禮拜，而可以串演左閘嘅華美倫亦有傷，或要打止痛針先至可以上陣，加上新加盟嘅左閘蒙利爾又唔符合喺歐聯上陣資格，但雲格仍然願意將山度士借去甘美奧至季尾。至於雲格新愛將普多斯基更喺呢個時候向山度士贈興，呢名德國國腳喺社交網站twitter度話：「安德里山度士，我哋都會好掛住你，祝你前程似錦！」
話時話，山度士加盟兵工廠至今，都好似唔多適應英超嘅踢法，雖然佢口口聲聲話自己多踢幾場就會好「弗」，但明眼人一睇都知佢有幾多斤両，所以如果佢返去巴西，對佢及阿仙奴都未嘗唔係一件好事。而且，巴西目前正舉行森巴嘉年華，喺阿仙奴屈咗咁耐嘅山度士，仲可以藉住返巴西傾轉會而鬆一鬆，同火辣嘅森巴女郎跳跳舞，發洩一下悶氣，話唔定人都醒神啲！
其實，除咗山度士之外，兵工廠仲有另一件瘀血、俄羅斯攻擊球員艾沙維係雲格好想清走嘅，唔知雲格會唔會趁俄羅斯轉會窗喺2月底關閉前，好似送走山度士咁送走艾沙維呢？