嗌奶粉交 - 陳也

嗌奶粉交 - 陳也

今日想應節,赤口搵交嗌,話題是熱爆的奶粉風暴。博鬧Top 8如下:
一、引述專家講,一歲後B B開始吃糊物,應該戒奶,冇必要搶。(有港孩必有港媽,實第一時間鬧爆你。)
二、鮮奶都冇益,唔應該飲太多。這也是專家研究,有書有數據。(同上,港媽勁問候專家,有可能的話,會拆佢祠堂!)
三、恨名牌之過,何必一定要搶三幾隻大牌子。(冇理由有LV都唔吼。)
四、廣告誇大,吃其他牌子,B B一樣有便便的。(食第二隻,便便軟𥐙𥐙㗎,你睇!)
五、B B轉奶粉等於轉校,好快適應的。(個仔喺我肚裏九個月,我生仔定你生仔!)
六、港B還可以轉奶粉牌子,國產B只能捱貴價水貨,邊個慘些?(喂,你係咪港奸?)
七、水貨客打救了很多小型藥房,打破霸權,否則通街都係連鎖店。(再講,打×你!)
八、橫豎香港人最愛過羅湖食嘢揼骨唱戲,乘機反掃水貨,帶奶粉回來冇限制的嘛。(咁貴!X Y Z費鬼事睬你個癲婆!)