偵探社稱派俊男撬走小三 索價五萬<br>第四者服務搵大婆笨

偵探社稱派俊男撬走小三 索價五萬
第四者服務搵大婆笨

【本報訊】情人節快到,有愛侶為佳節花盡心思,也有人因身邊伴侶有異心深受困擾。近年有偵探社引入趕走小三的「第四者服務」,利用俊男美女撬牆腳追走小三。有人妻為挽回婚姻,花費8萬元使用服務,最後卻落得「人財兩空」,丈夫沒返回身邊,質疑服務純屬賺錢噱頭。有社工提醒,處理婚姻危機,必須夫婦坦然面對,單趕走小三根本無用。
記者:林賽香

情侶之間出現第三者往往難以解決,第四者服務亦應運而生。易仰民攝

年過40歲的李太結婚21年,兩年前情人節前夕,在丈夫手機發現情慾短訊,「佢同女同事傳情慾短訊,個女仔我見過,廿幾歲,好靚,肯定佢哋有嘢」。為怕丈夫東窗事發,趁機攤牌離婚,她只好啞忍,「我唔想個仔有個破碎家庭」。她偶然間在網上找到偵探社的「第四者服務」,於是一試。

反遭偵探社威脅

到達偵探社後,職員向她展示多張有型靚仔相,大力推銷服務「好使得」,「佢哋話呢啲靚仔追女仔好掂,送花、送名牌、食燭光晚餐,一個月追到嘅成功率有九成。我諗住如果小三受吸引移情別戀,老公見外面啲女人冇真心,就會覺得老婆好,返嚟我身邊」。惟服務並不便宜,偵探社向她索價5萬元,李太愛夫深切,即付款使用服務,「我想攞收據,佢哋就變得好惡咁話呢行唔興,我一個女人畀幾個大男人圍住好驚,唔敢攞」。
惟數月後婚姻不見起色,丈夫仍不黐家,一點不似失戀,李太致電偵探社,「佢態度好惡,話跟緊,叫我唔好催」。最後職員拿出一張含糊不清的相片,指相中男士就是第四者,女的是小三,「我都睇得唔太清楚,好懷疑係咪真,我想拎番張相走,佢哋唔畀,仲話要畀多5萬蚊,又威脅如果唔畀就講畀我老公知,一定會搞到離婚」,幾經拉鋸,她支付了3萬元脫身。
基督教家庭服務中心社工曾美娥坦言,有不少接受婚姻輔導的個案,均曾聘請私家偵探跟蹤伴侶,惟也是第一次聽聞第四者服務。她直指這類方法無助挽救婚姻:「如果唔正視感情嘅問題,今日你請人趕走小三,聽日又有小四、小五……出現,你請得幾多偵探?而且如果畀伴侶知道你請人撬牆腳,會破壞互信,夫妻之間嘅關係更加惡劣。」
她認為,婚姻出現問題甚至有婚外情,與夫婦雙方性格及相處有關,必須坦誠面對,「拎出嚟傾,唔可以收埋唔理」,而且必須自我檢討,找出問題癥結,改善缺點,然後慢慢修補關係。

李太花八萬元使用第四者服務,最後落得人財兩空。