大年初二，恭祝各位英超球迷英姿煥發；西甲擁躉富甲一方；德甲fans得心應手；意甲球迷當然是如意吉祥，大吉大利！成為講波佬後，已適應近十年年卅晚或大年初一均要開工，當然這是高興的，有利是𢭃嘛！現在升呢派利是，當然更高興；最高興是有囝囝做代表收回成本！
今個新年好波連場，年廿九晚有車仔、曼城陪大家打通宵牌過年；年初一日頭有賀歲盃，晚上有曼聯；今晚有利物浦；明天初三又有華倫西亞對PSG的歐聯，碧咸雖未能上陣，都可睇吓佢班隊友狀態點。但我最期待，卻是初四晚上曼聯對皇馬的歐聯大戰。
紅魔球迷該會記得03年4月23日，歐聯16強次回合，曼聯要主場淨勝皇馬兩球才能出線，可惜開波12分鐘便被朗拿度破門，大分落後1:4。畀着很多球隊，此時戰意都煙消雲散，比賽提早完結；可是當時曼聯眾將從無放棄，結果由碧咸於比賽尾段搏盡射成4:3反勝。縱然出局，但這份打不死的鬥志，是英格蘭球隊以至曼聯獨有的特質，可能就是紅魔吸引這麼多球迷的原因。等了10年的復仇機會，面對最不能小看的對手摩連奴，買定花生等睇戲！
說到曼聯球迷數字，上周舒米高訪港，記者會派發的資料指香港估計有220萬曼聯球迷。大佬！我哋得700萬人，即係每個3人家庭便有一個是紅魔躉？雖然我都捧曼聯，但好似真係吹大咗喎！
方柏翹
now足球評述員