有「香港G-Dragon」之稱嘅前E-Kids成員阮民安（Tommy），雖然前排捲入Bigbang門票風波事件同欠租事件，負面新聞多多，但憑住打不死嘅香港精神，繼續有MV拍，之前整咗首叫《踩唔死我》嘅「新歌」，話係「惡搞」韓國組合Bigbang隊長G-Dragon嘅單飛曲《CRAYON》，所以，攞正牌抄....唔係，直情係複製個MV出嚟，實行循環再用。
個MV 8號(年廿八)放上Youtube，即刻成為網民熱話，兩日已經有過萬點擊。Tommy將自己嘅新聞寫成歌詞，入面個造型抄到足G-Dragon，有唔少網民睇過都問Tommy：「係咪想俾人開年？」亦有網友問：「查實佢仲有錢拍咩？」
佢喺MV入面唱得好唔好聽?見仁見智啦，不過MV入面造型道具都算有心機，已經唔使創意啦，用啲錢做道具都好應該嘅!不過Tommy真係蠱惑呀!入面原來zip咗唔少好難認樣嘅shot都係剪番《CRAYON》!不過就左右調轉扮自己拍，搏你認唔到！
人哋錢國偉拍《江南Style》，雖然都係抄，不過製作都算認真，個個shot亦係真拍，呢啲咪叫誠意囉！以前人哋「惡搞」，係因為想整番啲原著冇嘅搞笑成份，估唔到依家「惡搞」，就變成抄襲嘅好藉口！
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/