無綫重播神劇《天與地》啱啱播完大結局，前晚劇中演員佘詩曼、林保怡、陳豪、黃德斌同埋年輕版藝員，獲重金邀請喺荃灣擔任度歲活動嘉賓，阿佘笑笑口話發咗個新年財。
DBC數碼電台即場頒發「最正氣大獎」畀歌曲《年少無知》，呢個已經係佢哋第八個獎，大家都覺得係奇蹟，林保怡、陳豪同黃德斌當然即場獻唱搞氣氛。台下觀眾仲向陳豪催婚，怕醜陳豪話：「收到收到。」德斌整蠱佢話：「相信陳豪遲啲會同大家公佈喜訊。」保怡繼續講：「最佳男主角。」之後德斌又踢爆保怡再置業，令保怡扯開話題避談。
疑拍打小德斌
全晚惟獨唔使唱歌嘅阿佘表現勁風騷，講祝福語時疑錯手拍中小德斌。提到阿佘最近花咗四千萬喺跑馬地置業，佢話：「唔會搬入去住，用嚟投資，𠵱家買樓都要八位數，好快已經有人叫我放盤，我會留多陣先。」
阿佘話啱啱探完周家蔚同洪天明嘅BB，話B仔似足天明，問佢恨唔恨？佢話：「暫時未有，身邊好多BB可以借嚟玩，情人節都係一個人過，我蛇年會努力去搵（姻緣）。」有傳佢加盟英皇做一姐，阿佘大方承認有傾過，但未傾價錢，都希望有機會同《天》劇拍檔再合作。
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/