最醒目
迪天奴（左）噚日朝同7歲大囝囝Matheus（右）齊齊入大球場。兩父子好受歡迎，觀眾爭住同佢哋影相之餘，仲有球迷主動派利是畀Matheus；佢就好醒目咁話，蛇年願望就係爸爸入球數字多過舊年。
最尊貴
社民連立法會議員梁國雄（圖）喺維園花市嘅攤檔，噚日朝5點幾先收爐，休息幾個鐘就入場睇波，仲同小記大講波經。「長毛」話年年都會入場睇賀歲波，最記得係1983年港聯3:2險勝丹麥AGF；相比之下，今屆戲碼就好失色，但睇賀歲波同食煙一樣，鋪癮戒唔甩。
最大方
上海上港球迷全場只得小貓三幾隻，身為球隊球迷會主席嘅徐金暐（左）就同朋友專程來港捧場，仲話今、明兩日會到尖沙嘴同銅鑼灣瘋狂shopping，小暐話知道港人叫內地人做「蝗蟲」，但自己買嘢會好守規矩，唔會影響到港人。
最吸睛
年初一最緊要熱鬧，喺港聯對釜山偶像開賽前，就有傳統舞獅喺場中表演，雖然唔係乜嘢新奇事，但球迷爭住舉起手機影相。始終係過時過節，舞獅呢啲傳統風俗夠晒氣氛，又好意頭，點都係最受落！
最黑仔
新年流流，蒙通聯兩個門將都算黑仔；先有正將龍門卡雲（倒地者）上半場補時階段斷腳脛退下火線；再有後備門神烏馬連喺禁區外手球領紅被逐，最終搞到左閘望角要客串守龍，但仍得到球迷掌聲支持。
最畀面
泰國駐港領事Chakri Srichawana（右二）應邀入場，雖然佢唔太鍾意足球，但特別帶十幾個居港泰國人同泰國國旗，撐足全場，真唔話得！可惜蒙通聯輸波，領事仍好有風度，祝香港人同泰國人喺蛇年健康，兩地繼續繁榮。
