資深食經記者/編輯西蒙Ｎ在報界工作十八年之後，大概覺得寫食經，講食經寫得多，講得多，不如自己下海，開番間餐廳，實驗吓自己嗰套「美食概念」究竟有冇市場。
有此一念，西蒙Ｎ與兩位朋友合作，去年因緣際會，知道香港大學西部校園有多過一間新餐廳之需要，又要配合九月入學，於是擒擒青咁組成班底，兩個月內裝修，果然以誠心打動，力壓某飲食集團，中咗標，可在港大西部校園逸夫樓地面開設一間餐廳，以應學生及教職員之午飯晚飯需求。
佢間餐廳落成之後，幾位老友一直冇時間去，原因之一係的士司機都唔識路，去到大學本部行過去又幾遠吓，卒之拖吓拖吓拖到新年將至。Ｋ姐在過年前搵到港大社會科學院校友社長Ｍ，大狀Ｌ，名店總經理Ｍ姐等，叫埋左丁山，衝上港大，的士司機聽咗去邊之後，幾乎發火，面色唔係幾好睇，卒之在浦飛路巴士站Ｕ轉上天橋，再右轉去西部校園停車場內之垃圾房停低，行幾步就有升降機上到地面，行出不遠就係餐廳咯。
餐廳名Bijas，西蒙Ｎ話係梵文，直譯係「種子」（seed），意譯係心靈種子，中文可叫做「心有一念」，西蒙決定呢間餐廳只售齋菜（新派），絕對無肉無蛋，治店概念係豐子愷說話，「養生者，護心也；去除殘忍心，長養慈悲心，然後拿此心來待人處世。」此句名言印在牆上一對透明膠板，因是香港大學，有不少人只講英語，於是附有英譯，「Preservation of life is preservation of the heart. Replace the heart of cruelty with that of kindness and benevolence, and let it be the way you see others and the world.」總經理Ｍ與大狀Ｌ兩位女強人都話譯得好傳神。此店全部環保裝修，座椅來自漢華中學舊爛櫈，羽毛燈裝飾之羽毛來自體育館之破舊羽毛球，木間隔來自「可再種植林木」，出售產品係公平貿易有機產品，幾位樓面係聽障人士，樣樣都講究一念為善，一念為地球可持續性，真係服咗佢。不過講到尾啲齋菜如何呀？此日我地訂咗一席「清泉」，每人收150元，食齋居然食到飽到上心口，少見之至。至於齋味道/精緻？左丁山大膽講一句，憑此一席「清泉」，真正食齋人士或vegetarian，可視此大學齋舖為星級餐廳！