昨晚半夢半醒時唔知有冇聽錯，足總人士話港隊周中打和烏茲別克係勁，但係不嬲做法係贏波先有獎金，和波免問，所以呢，決定畀個機會一班香港隊響賀歲波期間，落場接受球迷嘅歡呼，一於以掌聲取代cash云云。
假如以上建議來自球迷要求，合情合理，正如昨日晨咁早有十幾、廿位忠實球迷仆入球場接機，出力（包括手掌力及腳骨力）本來就係球迷專利，而領導層呢，都可以出力，但係出錢先係你嘅權利。正如新年流流，後輩嘅負責𢭃利是，前輩嘅就負責派利是，你來我往，不亦樂乎！對落場搏命嘅球員嚟講，金錢回報唔應該係落力嘅原因，但係若果呢幾日入大球場又幸運遇着大老細，記住𢭃多幾封利是，你應得嘅。
打真波未必有實質回報，打假波卻隨時家財千萬，當然係講緊不義之財啦，原本對「假波」呢個字好反感，因為聽得最多係每當出現大熱倒灶嘅賽果，有一撮球迷們就至鍾意用呢兩個字嚟總括一切，唔使審亦毋須分析，一定係有陰謀，一口咬定之後球迷們就可以安樂上床瞓大覺，呢句「打假波」確實扼殺咗大家想象嘅空間，以及理解比賽嘅能力，之但係最近一連串調查中嘅假波事件，又提醒緊我哋呢個世界確實係有假的真不了嘅球賽正在上演中。而最離奇嘅係案件透露，被人收買嘅球員收到order，但並唔代表想要幾多球就幾多球，要入球大卻射極都係細，指造假但係假唔出，咁仲算唔算係假波呢？若果今時今日有位專家自封為「假波專家」，專門踢爆假假真真，應該有市場，各風水名家不妨考慮兼職。
有錢並唔係大晒，健康身體先最緊要，有位搵錢最多嘅仁兄呀「英超」，就決定下屆開始keep fit搞瘦身行動，為各隊設定薪金上限，向美式運動偷師。一來防範富豪球會從天而降，二來免致球員坐大，拖垮球會，長遠有乜效益未知，但短期裏面就肯定會減弱各大球會天價買球星嘅能力，惟有英超呢個老字號先夠guts咁做。不過美斯都話咗唔會效力第二間歐洲球會，至於C朗呢？萬一要回歸紅魔的話，絕對可以效法碧咸嘅善事招數。新一年，祝各位有心有力，財聲（掌聲）兼收。
keyman
now TV主持
mailto:[email protected]