「新年快樂！」啱啱轉投巴黎聖日耳門（PSG）嘅「萬人迷」碧咸相當識做，冇唔記得今日係大年初一，特登學咗句中文，同各位中國球迷拜年！雖然咸哥嘅狀態麻麻，上周五場法甲仲未可以上陣，但球隊靠文尼斯、伊巴謙莫域同拿維斯各建一功，主場贏巴斯蒂亞3:1。不過值得一提嘅係，呢場係PSG近9場聯賽首次有失球。
𠵱家中國球迷越來越多，各大歐洲球會都有賀年活動，好似英超嘅曼聯前幾日就搵路爾斯安達臣同阿歷山大畢拿等後備兵去放孔明燈，又打吓鑼鼓咁，睇片都見佢哋玩得幾開心。另外，西甲嘅西維爾亦搵咗班球員拎住揮春，同中國球迷拜年，其中最為大家熟悉嘅有前阿仙奴翼鋒雷恩斯。