千億新抱徐子淇嫁入李家六年，每年農曆新年都會與老爺「四叔」李兆基、夫婿李家誠及子女出外度歲，今年她計劃到美國迎蛇年。子淇日前接受本報記者專訪，即席揮筆寫願望，一向中文麻麻的她寫上「心想事成」，她笑言「成」是「誠」字，長期都擺夫婿在心中。
𠱁老爺落水
子淇今年計劃在美國與海豚游水迎蛇年，她說：「之前同老公試過同海豚游水好好玩、好浪漫、好sweet，佢識得錫番你，今次帶埋小朋友，連囝囝歲半都可以落水餵魚，全家人都一齊去，我同老爺講過，唔知佢會唔會落埋水。」
問子淇小時候的過年習俗，她即興奮說：「由細個開始，年三十晚夜啲瞓，爸爸媽媽長命啲，嗰時好開心，因為以前好早瞓，嗰晚可以12點都唔使瞓，又覺得好孝順父母，習俗話越夜瞓越長命，仲有年廿八洗邋遢，年初一唔會亂掃嘢。」問到會否向四叔等長輩敬茶？她說：「每年一定斟茶畀父母長輩，就算我哋每年去旅行，成個禮拜全家人都一齊食飯，都會喺外邊搵中餐，食髮菜蠔豉。兩個女一定着旗袍仔，好得意，紮兩個髻仔，幫佢哋影相，會幫個仔着中國衫。」
女兒偷糖食
子淇大爆子女過年的趣事，她說：「識收利是，每年都幫佢捐出去，舊年開始就畀200蚊佢，同埋食好多糖果，個糖果盒每日都要補，佢哋識得偷去攞糖，所以我會擺啲冇咁好味嘅糖，例如瓜子、蓮藕，個女覺得唔啱食少咗偷，之前擺朱古力金幣，偷得好快。」記者問她蛇年會否再添小朋友及新年願望，她說：「添唔切，冇得即刻，慢慢嚟，新年願望都係想全部人開心。」
採訪：梁錦雯
攝影：陳志嵐
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/