【赤鱲角機場】現年46歲嘅林憶蓮同35歲嘅恭碩良呢對姊弟戀，有話因為恭碩良𠱁掂憶蓮14歲嘅囡囡喜兒，所以佢兩個拍拖唔需要咁避忌。噚日喺機場見到林憶蓮同恭碩良，恭碩良拎住大件樂器喺閘口等查證件，成班記者即刻走埋去影相，佢哋兩個唔單止冇避忌同冇黑面，反而笑晒口任影。
問佢兩個去邊度玩、係咪去第二度過情人節？佢哋都笑笑口，但就唔答，影影吓恭碩良攞住件樂器遮住塊面，憶蓮就突然間主動蹺住恭碩良，仲成個頭挨落男友嘅膊頭，臨入閘之前，恭碩良同大家講：「新年快樂！」
溫拿去大馬
另外，溫拿五虎噚日都喺機場出現，阿倫譚詠麟話佢哋去馬來西亞開工，但就冇講幾時返。而日前阿倫幫有線錄影賀年節目時，講到邊個老友最有生意頭腦，佢抵死話：「阿叻做馬圈最叻，志偉最叻係點火頭，都冇乜邊個有生意頭腦。」
採訪、攝影：李珮洳
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/