近排，友儕間都議論紛紛，樓價會幾時回落呢？可能我的朋友間，大多數是收入比較穩定一族，況且他們父母也上咗岸快退休，絕對願意借出首期，所以好多friend都想「上車」。姑勿論現在樓價高定低，入市錯定對都好，令我最百思不解的是好多港人，對買樓的資訊好有研究，但對買家具及燈飾有許多錯誤見解。個啲謬論是七八十年代遺留至今的，真係笑死人！
1.買燈飾嫌60 watt唔夠光
真的，這是我每天都聽到客人的要求，嫌燈具只能放上60 watt燈膽唔夠光亮。無錯，不少港人小時候像我一樣，是白色光管燈下長大，而且仲要係打孖嗰隻（兩條燈管一起開着）。可能就是這個原因，港人對「光到爆」嘅環境習以為常。講真呀，今時今日，香港人出trip多過食飯，住過咁多靚酒店，仲唔明白舒適的光度色溫的重要性嗎？你有幾何見過thai spa會裝大光燈呢？
而另一點大眾唔明白的是每個area應有不同的強弱的裝置。飯廳應最光亮，比較下睡房應最暗。但好神奇的是太多港人要求在睡房天花上裝置高火數的大燈。很多人甚至用上大酒樓常見的大水晶燈在睡房內，而每次問客人為何，通常答案係因為女主人要夠光度搵衫。真係「吹脹」！
仲有，lighting effect要造得靚的秘技，在於盡量減少direct lighting（直射光）。舉一個例子，你就會明白。如果天花上只有一個光禿禿的燈泡，對比燈泡外有燈罩，你說前者或是後者比較靚，及更能令戶主的面色好看呢？不用多說，都自然明白後者比較好啦。所以通常反射或燈膽被罩着的燈具會相對地能夠create ambience。
若果你家中有老人家，所以飯桌的照明有需要比較明亮，我會建議你買Artemide出品的Pirce Lamp，因為它是可以裝設400 watt太陽管，夠光兼係黃光，而光的方向是先投射上天花板然後反射下來，所以用家不會出現大眼袋或毛孔暴現。你……想唔想靚呀？
2.對高背梳化的迷戀
不明所以，但港人對高背高頭枕的梳化，有着瘋狂的obsession。有句廣東話叫做：「攤屍」。但西方人是不會明白的，皆因西人的「crash on the couch」是打橫瞓在梳化看書，所以外國人喜歡矮手柄或無手柄的梳化。港人則不同，由於香港人最鍾意「攤屍」睇電視，因此要頂住條頸保持眼睛與電視垂直line up 。其實這個姿勢對脊椎及頸椎是不健康的，所以名椅Aeron Chair就永遠不會生產有頭枕的設計。
姑且不去爭論舒適度的分別，皆因這方面是因人而異，但不能否認高背梳化比例上是很難看。
如果要style得靚又要有得「攤唞」，我認為梳化用矮背，配襯一張高背單座吧。且看 Patricia Urquoila為西班牙品牌Kettal設計的Vieques系列，就是用上這個配搭。因為梳化一般都比較有長度，如果仲要高背就會太bulky looking。單座則相反，越窄越高就越好看。
3.搵足一世的窄枱及電視架
提起家具的黃金比例，在桌子這個類別是至為重要。不合比例的枱形除了視覺上扣分外，亦有承托不穩的風險。但許多港人，常常幻想會找到一張30cm深，110cm闊的枱。（但我唔知他們用來放甚麼？估計係用來攝大門翻入撞埋牆角嗰個鬼鼠位。）也許我見識淺薄，在下從未見到歐洲大廠會生產這個比例。比較common的是40cm深×120cm闊，但枱高則減低至70cm，以免出現香雞腳（見圖）。我有些客戶多番尋覓此畸型比例不果，甚至找老師傅造，但每每給師傅痛罵，因為太窄太高的桌子是頗容易弄翻的。鬧得好！
為了慳每一吋空間的港人，又怎會放過電視架的深度呢？好幾年前，電視牛龜咁大部，電視架深度有兩呎多。但今時今日，若果你不是膽機粉絲，可能45cm深已經夠用。可惜歐洲大廠則沒有與時並進，暫時仍在生產50cm深的電視架居多。唯一有一家Galotti & Radice剛推出的Air系列，有35cm深的選擇，但只可用於吊櫃version。但港人這個50cm以下的要求卻頗合理，今勻我都係企喺港人這邊。
作者：招國偉@aluminium（mailto:[email protected]）