吳卓羲(Ron)、徐子珊、羅仲謙、馬國明同賈曉晨(JJ)等噚日去咗鑽石山宣傳無綫新劇《戀愛季節》，馬國明同吳業坤玩重口味，嘴對嘴扮錫，仲攬住一齊跳騎馬舞，非常騎呢。而曾經同Ron鴛鴦戲水嘅人妻梁靖琪(Toby)抽中同羅仲謙一組玩口餵棉花糖，Toby表現猴擒，手口並用狂拍謙謙巨胸，問謙謙有冇留意前女友傅穎簽新公司？佢淡然話：「祝佢有好發展。」
敏之晒腿賀歲
Ron最近同黃宗澤前緋聞女友唐嫣傳緋聞，佢笑話：「唔好講笑，人哋有男友邱澤。」對好兄弟林峯拍拖，佢話戥對方開心，但投訴林峯唔介紹女友畀佢識，唔夠兄弟。
講到全場最sweet當然係蜜運中嘅JJ，男友樊少皇返咗香港陪佢，仲住埋佢屋企，佢話：「有佢陪，冇禮物都咁開心。」另有傳子珊同周海媚爭戲份，子珊否認：「可以同前輩合作，做路人甲都肯啦。」此外，阿Ron、陳敏之喺上月尾去吉隆坡錄影無綫嘅春晚節目，喺節目敏之大晒長腿同阿Ron表演「二十四節令鼓」。
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/