上周「昆」唔到「雀」，今周再接再厲，攻擊騎呢昆士柏流浪，結合踢法及今次對手「天鵝」史雲斯主場戰績強橫，「包尾昆」成冷門亦唔似偷到「鵝」，史雲斯單W偏熱也要博做龍年尾糊。
上周看過英超早場昆士柏迎諾域治嘅波友，多會認同打落五五波，和波合理；當然昆士柏嘅貴價射手雷米突然倦勤，對球隊想搶W係大打擊！昆士柏攻力勢依舊疲弱。列納上月擸番嚟嘅半殘兵賓希姆、贊拿斯加埋即重用嘅左翼牛奶咀唐辛，笑料居多；齋靠死唔認要10萬鎊周薪簽番嚟嘅基斯杜化森巴、同巴西鋼門施薩索拉斯，班波搶攻又冇本錢，焗守場場和，都唔知幾時先甩得開個由去年9月起長坐嘅包尾位。當然年年3月起，怪事會在各歐洲頂級聯賽嘅下游區發生，我信列納做得到；但𠵱家，未係時候。
早前講過，韋斯咸強於中場搶截，結果佢哋憑地利，上仗成功氣走史雲斯，後者敗不足辱。不過呢隻「天鵝」返主場，嗰種「搓到你暈」嘅踢法，相信會食住粗糙嘅昆軍，尤其佢哋已保持所有賽事計6場不敗（2勝4和），當中曼聯、阿仙奴同車仔都未佔甜頭；防守有同荷蘭人禾姆一樣咁穩嘅後備龍德國查美爾，前線王牌、靈活及快速嘅米捷，唔會怕森巴擋到路。史雲斯月尾要同乙組巴拉福特爭英聯盃，此刻不論主力及副選要開始儲印象分，冧主帥米高勞特立博到時有得喺溫布萊亮相。兩軍正常發揮，主W穩開，兼博[-1]「主勝」。
再選，博同時間開波嘅車路士反底大炒韋根，賓帥呢份臨時工𠵱家真難頂，當然佢哋唔會理會下周四要作客捷克踢歐霸，最緊要幫油王隊波保住前4踢來屆歐聯；國際賽效應因英巴戰在溫布萊上演，對有唔少英巴主力嘅車仔影響相對輕微，反觀韋根呢支國際兵團則大件事得多，最大鑊仍然係3-4-3個陣冇咗主力中堅拉米斯，今年起5戰聯賽失咗12球，除非費托真係好廢，否則呢場應該有士哥，幫架車大炒止吓血。(下次見報日期：16/02)
文：蘋果波神