人物故事:太極黃錦康 應市即買

人物故事:太極黃錦康 應市即買

當黃錦康仍任美聯副主席,就已在首批開售時拍板購入油麻地御金.國峯相連單位,最近入伙,記者於是找黃錦康幫手驗樓,但很快就發現「捉蟲」──信置固然不會待慢這位老朋友,還因為知道有傳媒到訪,執得滴水不漏,「佢哋執好先交樓,我係零執漏。如果有缺點,我唔會唔講嘅,哈哈!」太極黃的功夫,越來越耍家。
記者:葉淑貞
攝影:程志遠

黃錦康穿着黑底紅花的棉襖,神情輕快地帶着記者參觀平台、會所,「我在菲律賓起屋,所有平台、花園、壁畫,我通通照抄這裏的花款,影張相傳去大陸造,再寄到菲律賓裝嵌。」擺明做copycat,曲線大讚信置的度假會所設計超水準。

黃錦康收樓後笑言:「冇嘢要執, 我個裝修師傅得好少生意。」

「太極黃」致力宣揚太極,以一招「應肚即飛」聞名。

趁政府出招入市

「入市時(2011年12月)政府出招,市場氣氛差,我這兩個相連單位才11,000蚊呎。每呎地價都7,000元,加上起碼3,000幾的建築費,信置賺乜?我仲以為發展商會縮皮,不過又冇啵,樣樣都係豪宅標準,喜出望外呀!」由牆身、窗框、龍頭、抽濕機等所有裝置,黃錦康都大讚特讚。
「唔好以為我買樓有優惠,開售當日,我大清早到售樓處排隊,冇折㗎!」他揀的是低層園景約790方呎兩房戶,兩伙共約1,600方呎,屬價單中的平價選擇,「好多人以為高層先至好,尤其內地買家,結果咪望樓囉!」他說事前要仔細閱讀規劃圖,預計哪些座向景觀會有變數,一早鎖定低層園景又平又穩陣,「當時好擔心排我前面的上海佬識揀,好彩佢唔識。其實好多經紀都唔識,哈哈!」

物業一梯四伙,太極黃獨佔一邊,暫時無意打通。

【直擊驗收御金.國峯】

【牆身滑溜】好平滑,裝修師傅話唔使再油。

【靜音靠靚框】隔音除咗玻璃,框架的質料其實更加重要。這些框架很堅實,師傅說淨買露台門框都要20,000幾蚊!

【廚房試水】
水龍頭都係靚嘢,仲有電視機,工人最開心。

【靚牌子電器】
家電都係大牌子,真係豪宅級。

廚房被發展商形容為「勞斯萊斯」,如德國電器Gaggenau。

【罕有抽濕機】
一般來講,只有南區、海邊豪宅才會在走廊設抽濕機,呢個只係800方呎單位,竟然會有!

【沖涼睇電視】
本身都想在浴室安裝電視,𠵱家慳番。

鍾情菲律賓 建萬呎行宮

在金錢世界打滾,壓力沉重,黃錦康過往在市區、新界都有個安樂窩,以便假日時有個喘息的地方。去年,他把持有十多年的加州花園沽出,「因為元朗開始似市區。」除了搬到油麻地,更在剛開通國際航班的菲律賓中部Iloilo,買入5公頃地皮建造萬呎行宮。
「我曾經有位基金界朋友,在英國買了間古堡!從事這個行業的,個人投資都是樓股先行,真正賺錢的是股,但一定要有點房產,即使經濟變壞,一無所有,都仲有個靚竇。這行壓力大,個個都想擁有世外桃源,我嗰個就在菲律賓。」他的首選本來是深圳,但地價太貴,加上空氣污染,其實不太適合他吸收日月精華;而現任妻子為菲籍,興建地點毗鄰其家鄉,「佢係村長個女!」他笑說。

太極黃看中御金.國峯會所的大幅壁畫,已經拍下相片照造,再運到菲國私竇。

先親身了解後投資

建屋預算是七位數字的美金,取名TC Garden(太極山莊),「那裏令我想起三、四十年前的淺水灣,日間藍天白雲,夜間滿天繁星,可惜香港光污染嚴重,我們早就忘記了。」
可是,我們忘不了人質事件,09年集體屠殺政客和記者的血腥風暴,更是想想都發毛,不過太極黃自有睇法:「點解基金經理曉得在全世界趁低吸納?因為他們會親身到處飛,而不是單睇新聞。菲律賓有些地區真的去不得,但亦有很多適合居住和投資的地方。」都係嗰句:「先了解,後投資。」

以殖民地色彩設計的太極山莊藍圖。

【小檔案】
財金資歷 更勝地產

黃錦康84年大學畢業後,過了三年財經記者生涯,後赴英深造,回港轉戰金融業,在財金界的資歷遠比地產深厚,「我做咗美聯幾年咋(08至12年),但因為比較高調,搞到一般人都以為我唔做地產轉做股壇,其實呢個先係老本行。」現為股壇紅綠燈顧問有限公司董事長,並致力宣揚太極,暱稱「太極黃」,招式「應肚即飛」於去年倫敦奧運期間頻現公仔箱黃金廣告時段,人氣不遜劉翔。
在訪問中不時發出響亮笑聲的太極黃,開心人亦有傷心處,妻兒先後於1999年及2012年因癌病逝世,記者故意不問,但他主動提起。買御金.國峯時,愛兒德仔尚未離開,「本來諗住預一間畀阿仔住。」興建中的夢幻樂園TC Garden,TC除了指太極(Tai Chi),亦意指德仔(Tak Chai)。見盡繁華之後,唯有他,莫失莫忘。

愛兒德仔,是父親心頭永遠的牽掛。後為現任菲籍妻子Amy。

新game出爐 ~ 快啲試下自己有無辦法上車啦!
【「樓」年運程小測試】
http://www.tomonews.net/game/hkhousingpolicy/