利物浦一代後衞加歷查前晚宣佈喺季尾榮休，為佢嘅16年踢波生涯劃上句號。雖則佢有教練牌，但聽講唔會教波，反而轉戰電視台，同列納及加利尼維利拍檔講波。
35歲嘅加歷查係英格蘭球壇嘅忠臣，事關佢由出道至今都係效力利物浦一間球會，上陣超過700場，仲幫球隊贏過1次歐聯、1次歐協盃、兩次歐超盃、兩次英足盃同3次英聯盃，所以深受紅軍球迷愛戴。甚至有人提議會方應該將佢件23號球衣掛衫，以表揚佢對球隊嘅貢獻。
加歷查話：「我9歲就加入利物浦嘅青年軍，成個職業生涯都喺度過；我好榮幸可以喺一間咁偉大嘅球會踢咁耐波。」由於加歷查有歐洲足協嘅B級教練牌，所以有條件喺掛靴後教波，但據報佢對做講波佬嘅興趣大啲。消息指佢應承咗英國嘅《天空體育》，由下季開始同前隊友列納，仲有曼聯名將加利尼維利拍住講波。不過，佢個囝囝占士就喺2011年成為紅軍青年軍，而且備受好評，睇嚟過多十年八年後，球迷會見到另一個加歷查幫利物浦比賽。