若以喜劇而論，吳君如即使未到宗師級數但亦絕對經典，想當年「程大嫂」唇上滿佈汗毛的造型至今仍叫人歷歷在目；而以喜劇鬼才來形容鄭中基（Ronald）亦絕不為過，「暴龍哥」一角短短十多分鐘的演出便為他拿下金馬最佳男配角的獎座。二人於黃百鳴監製、谷德昭執導的賀歲片《百星酒店》中再度合作，加上毛舜筠、詹瑞文及薛凱琪等人，難怪谷德昭表示最好的喜劇演員全聚集片中，不過他也呻辛苦說：「成班人都儍㗎，喺片場冇可能控制到佢哋！」
撰文：文國駿
現已上映
近年賀歲港片大戰，離不開曾志偉跟黃百鳴，在牙骹戰上勢均力敵，但計在港票房，黃百鳴三年未贏過，今年他找來好友谷德昭繼《家有囍事2009》再度為他執導賀歲片出戰，截至昨日票房領先志偉的《2013我愛HK恭囍發財》。日前谷德昭率領吳君如及鄭中基宣傳新片《百星酒店》。
群戲多 易失控
其實每年一度的賀歲片題材早已拍膩，問肥谷如何想到以酒店作為題材？肥谷表示整件事也是「以人為本」，他說：「其實一接咗呢部戲，我第一個諗法就係搵人，演員先係最重要，所以我搵咗我認為現今最好嘅喜劇演員，好似鄭中基、吳君如、毛舜筠同詹瑞文等，之後我就諗點困得住呢班人呢，所以就諗到用酒店嚟做題材，可以困晒佢哋喺入面，所以今次電影入面以群戲較多，成日都一班人。」
肥谷還大爆一班笑星拍戲時無厘正經：「成班人都儍㗎，喺片場冇可能控制到佢哋，葛民輝嗰排有腹肌好有能量成日煩住我， 惟有嚇佢哋拍唔晒就要留多兩日，咁先靜晒埋位。」
免刪剪 好玩啲
肥谷透露今次電影往內地送審時竟然一刀不剪，安然過關，他說：「我嚟緊都係會繼續拍喜劇，但希望係主題喜劇，好似動作或者驚慄喜劇等，不過我發覺我哋條線可以再低啲，今次一啲都唔使剪，好多時我哋都係自我審查多咗，下次可以好玩啲。」
君如於《百》片中飾演一名對房間整理嚴格得接近病態的房務總管，她自爆角色跟自己性格頗相似，君如說：「其實我都係有少少控制狂同潔癖㗎，我對屋企嘅嘢擺邊絕對知道得一清二楚，我叫工人幫我拎嘢都可以講明邊個櫃第幾格。」君如續表示自己到外地時必會有一樽消毒酒精跟身：「我睇過《60分鐘時事雜誌》，其實酒店最污糟係個電視遙控同地毯，呢兩樣嘢成日都會有啲你估唔到嘅迹喺度。」肥谷聽到後即大講有味笑話，那些是「精」采的污迹，簡單一句已引起三人你來我往笑個不停，相信在拍攝現場時的火花應該更甚。
扮鬼飄 屈斷頸
一輪笑聲後君如續說：「因為群戲多嘛，一人一句對白，如果守尾門嗰個講唔掂就要從頭嚟過，連毛姐都成日喺片場叫我哋唔好整佢，我都試過講一句好簡單嘅對白講咗幾次都唔得，因為喺間酒店入面成百人望住你講一句，係會幾緊張。」
常言道演而優則導，問到曾奪金像及金馬影后的君如可有想過一嘗導演或監製滋味？她爽快地說：「我真係冇諗過做幕後，好煩㗎好多嘢要理。屋企嗰個（陳可辛）成日都話要對住好似我呢啲咁嘅演員好煩，我都話我夠要對住佢啲咁嘅導演。」雖然不想涉足幕後，但君如坦言想再演妓女及黑社會等角色：「呢兩個角色種類想再演囉，都幾掛住㗎！」
而剛於去年成為台灣金馬最佳男配角的Ronald拍攝《百》片時未知得獎，所以沒有得獎後的壓力，他憶述拍片趣事時說：「有場講我要喺酒店房天花板扮鬼飄過，點知幫我試位嘅工作人員原來矮我幾吋，搞到吊上去時全程要屈住條頸，睇唔到個樣，點知個效果仲好。」
場地提供：香港朗廷酒店
吳君如
化妝：Midco Chu
髮型：Billy Choi of Hair Culture
鄭中基
髮型：Horace of C
化妝：Mon Chun
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/