一位零售連鎖店高層T知道左丁山講1.5隻奶粉，來電指正：「其實又未必只係1.5隻奶粉嘅，我哋店舖報告，牛欄牌奶粉都幾多人買，講夠3隻奶粉啦！」唔，肥仔K話在貝沙灣見到有大把奶粉，建築邦在尖沙嘴見到大批奶粉，共通點係無人買以及見唔到美贊臣與美素佳兒，牛欄牌都比較少。尼爾森報告話六隻牌子佔去九成市場以上，即係美贊臣、美素佳兒、惠氏、雅培、牛欄牌等。高層T話：「淨係美贊臣已經佔咗五成佔有率啦，有話不患寡而患不均，𠵱家有所謂奶粉荒，其實最主要問題係美贊臣不能應付咁高嘅市場佔有率，市場份額平均分配就完全冇所謂奶粉荒問題。」
唔怪得蘋果報道一隻美國牌子AAA好勞氣，呢隻牌子並非暢銷，但一樣受政府辣招綁實，限制離境。對症下藥，所有公立醫院產房向初生嬰兒派奶粉時，盡量避開攞暢銷牌子，改派較冷門滯銷牌子，以後可以消除「奶粉荒」問題（按：因（一）所有醫生都話任何牌子奶粉無甚分別；（二）香港媽咪既然怕換奶粉，不如就在源頭供應不同牌子），如此假以時日，香港奶粉市場佔有率變得平均化，就唔會為咗奶粉而嘈到坼天。
政府不惜干預而干預，不識對症下藥，乃是官僚常規，何況梁政府政治掛帥，以政治壓倒行政，未諗清楚就推出甚麼招數，結果係煩親街坊而又未必收效。嗱，去年選舉時，不少民粹派泛工黨議員提出回購領匯，打破所謂領匯壟斷，為天水圍居民爭取天光墟，於是到咗梁振英上台，就推翻曾蔭權政府決定，特事特辦，批地在天水圍設立墟市「天秀墟」，又話不准牟利，交俾慈善機關東華三院去管。哦，天秀墟在二月一日試業，效果好差喎，人流少，生意凋零，批評多多，睇怕呢次東華三院都難搞得掂。左丁山因此問一位在天水圍返工嘅老友，佢嚡嚡聲咁話：「天秀墟離開輕鐵站十分鐘，天氣凍時行過去會嗌冷，天熱時行過去會嗌熱，落雨就更不方便。天水圍最大問題係區大交通曳，嚇阻人流，天秀墟點同商場競爭呀。」不過此乃「地標工程」，政府點都要撐住東華三院嘅，希望東華唔好蝕埋啲捐款啦