全國政協會議將於3月舉行，係唔少政協北上送禮嘅旺季。但新華社噚日出稿，話為貫徹落實習近平厲行勤儉節約、反對鋪張浪費嘅重要批示精神，今年全國政協會議要從16方面改進會風，主要係革除文山會海，簡化禮節性安排，包括不安排、不組織各類宴會；不贈送、不接受紀念品、禮品、土產等。喺咁嘅情況下，國務委員劉延東可能要忍吓口。
嘉麟樓出品 一樽330蚊
八方此話何解？因為政界流傳，劉延東原來好like半島嘉麟樓嘅XO醬，據聞有建制派中人每逢過時過節，都會「進貢」半島XO醬畀佢做賀禮。
半島XO醬有幾巴閉？食界一直流傳，話係食家王亭之1986年做半島酒店嘉麟樓顧問時嘅傑作，用秘製材料配以金華火腿、瑤柱同指天椒製成，堪稱本港XO醬始祖。呢樽半島XO醬十分矜貴，一樽220克賣330蚊，比普通XO醬貴幾倍。
劉延東獨具慧「舌」，據聞有建制派中人知道劉延東有此心頭好，不時買嚟送禮畀佢過節，等劉延東唔會冇醬用。之不過呢，劉延東今年或者未必收到呢份厚禮，唔係送禮者孤寒，而係大家都要響應習近平上場後嘅節儉「柯打」嘛。
有內地省市政協亦向八方透露，早前開會期間嘅會議文件寫明用餐時「按需取食，杜絕浪費」，嗰幾日唔單止食唔飽，想約當地領導人飯局亦被拒，原來啲領導怕夜夜飯局，令人覺得生活奢華，俾習近平知道就手尾長，所以近日紛紛謝絕應酬。查實每年兩會，北上開會嘅建制派人士都會帶唔少手信隨行，向京官聊表心意，相信今年班人大同政協，個篋會輕便好多囉！
mailto:[email protected]