山貓名宿班主「波神」米高佐敦（MJ）差唔多年近半百（48歲），之前婚姻失敗俾人分身家分咗成1.7億美元（約13.2億港元），但佢對愛情依然充滿希望，日前爆出佢同32歲嘅古巴名模未婚妻耶維蒂（Yvette Prieto）傳出婚訊，兩人將喺4月27日行禮，迎接人生第二春！
06年波神同前妻Juanita Vanoy離婚時，因為冇簽定離婚協議書，搞到MJ要分一半身家畀前妻，足足唔見咗1.7億美元，成為當時美國史上最昂貴離婚！好多人都以為佢見過鬼會怕黑，唔敢再結婚；不過，MJ離婚一年鬆啲就同耶維蒂撻着，仲俾傳媒影到佢兩個人拍拖飲咖啡。
難擋古巴名模魅力
米高佐敦同呢位古巴名模拍咗拖4年之後，前年終於出手求婚；大家聽到佐敦又想做「老襯」，都成為一時熱話。大婚日期將會係4月27日，伴郎方面，相信都不離「波神」公牛嘅好拍檔柏賓。聽落好正常，但係當「2哥」致詞嘅時候，仲有咩好嘢爆呢？話晒佢同波神嘅事，所有人都知得一清二楚；不如搵癲癲哋嘅洛文，可能仲過癮。
雖然聽到米高佐敦同耶維蒂結婚係件喜訊，但MJ始終係名人，估計有成5億美元（約39億港元）身家，大吉利是講句，如果今次都唔可以一生一世嘅話，分一半咪好大鑊？真心希望波神今次唔好再俾戀愛沖昏頭腦，記得要同耶維蒂簽婚前協議書。你知啦，冇咗一半身家，山貓成績又曳到喊，到時隊波再係咁蝕錢，真係賣埋佛羅里達州間超級大宅都唔掂。
波神囝囝唔happy
今次MJ再婚，一班波神後就好似一早知道咁，所以冇乜太大反應。成日都爆出負面新聞，整臭老竇個名嘅二仔馬加斯，日前都有同母親Juanita食飯，個勢好似講到明一定唔認耶維蒂做阿媽咁。細女Jasmine反而就為緊老竇2月17日，50歲大壽煩緊。
