港大法律學院副教授戴耀廷自從喺《信報》寫文呼籲市民準備佔領中環爭取真普選後，人氣急升，惹起政界以及社運人士高度關注。雖然萬人佔領中環成唔成事、狼英到最後會唔會出動防暴隊鎮壓，最快要等到出年先知，但戴耀廷喺未佔領中環之前，經已先勝一仗，前日成功直搗西環。
大家唔使驚，戴耀廷唔係走入西環做密室談判，佢只不過去中聯辦講書啫，係咪估唔到西環咁重視佢呢！話說前日佢應中聯辦邀請，入咗去中聯辦大樓同裏面嘅官員講解法治、司法獨立等議題，唔知呢項係咪讀法律出身嘅新任中聯辦主任張曉明嘅新政呢。八方反而好想知，戴耀廷席間有冇同中聯辦宣傳文體部部長郝鐵川過番兩招，交流對法治嘅睇法呢？