傳媒同球迷都好鍾意搵美斯同基斯坦奴朗拿度（C朗）嚟做比較，但我求大俠記得幾乎次次都係美斯威威，而C朗總係帶住無奈嘅悲劇。今次周中國際賽都唔例外，美斯嘅阿根廷贏波之餘，佢仲表現大方，同衝入球場嘅球迷抱抱；至於C朗雖然賽前生日，但厄瓜多爾贈興，作客贏葡萄牙3:2。
阿根廷3:2挫瑞典
周三，阿根廷作客瑞典踢友賽，戰情就冇咩特別，美斯亦冇波入，靠對方嘅烏龍加埋阿古路同希古恩各入一球，贏瑞典3:2。最值得一提嘅係88分鐘嘅小插曲，有個着住美斯件巴塞隆拿球衣嘅球迷走咗入球場。
通常職業球員見到呢啲情況，一係有咁遠走咁遠，一係就幫手制服球迷，但美斯就相當大方；既然有球迷嚟朝拜，咪企喺度等佢囉！呢個美斯粉絲真係當偶像麵粉咁，又搞佢啲頭髮，又錫佢額頭，當然唔少得整個深情擁抱。美斯俾人搞勻全身之後，啲保安哥哥終於趕到；個球迷過足手癮後，亦乖乖放過美斯，同啲保安一齊出番去。至於美斯就冇咩表情，事後搵件球衣笠住個頭，抹吓塊面；真係唔知佢係尷尬到冇面見人，定係個球迷留低咗好多口水！
C朗入波葡軍仍落敗
不過，原來美斯向來都對呢啲突然殺入場嘅球迷好好；喺舊年巴塞主場對馬德里體育會嘅西甲入面，都有個球迷走咗入場，美斯亦好樂意同對方抱抱。
另一邊廂，C朗嘅故事就先喜後悲。C朗2月5號、即係啱啱過去嘅星期二28歲生日，班葡萄牙都隊友好有隊長心，預備咗個大蛋糕送畀大佬；C朗切蛋糕嗰陣都好happy，擺晒甫士影相，相信佢勢估唔到之後場友賽會輸波。葡萄牙周三主場對厄瓜多爾，C朗喺上半場有份入波，葡軍一度領先2:1，但點知最後輸番兩球，以2:3不敵對手，相當掃興。