雖然已經有個靚靚女友Lisa，但經民聯成員之一嘅石禮謙，似乎仲好想來年行吓桃花運喎。噚日佢同成班經民聯成員，喺立法會桃花樹下拍賀年短片時，就對棵桃花非常感興趣，不斷同棵桃花合照，又成日摸啲桃花，唔通佢覺得𠵱家嘅桃花運仲未夠？
今次係經民聯第一次拍賀年短片，七位成員要逐一講賀辭，最終個個都一或兩take就搞掂，演出算係唔錯。據聞當中以林健鋒最一絲不苟，為咗呢十幾秒演出，事前不斷練習聲線、動作同造型，搞到其他成員都好有壓力。身形肥嘟嘟嘅金融服務界嘅張華峯，喺短片中祝市民盤滿缽滿，認真啱聽，如果佢變身做埋財神爺就更正喇！