有心唔怕遲，下定決心革新嘅民主黨大佬們，終於願意放低call機呢啲上世紀產物，擁抱WhatsApp，配合後生一輩嘅潮流。之但係每個人嘅適應期都唔同，好似黨主席劉慧卿就要耐些少啦。
有民主黨中人話，用咗call機多年嘅卿姐，已經好積極咁接受WhatsApp，不過卿姐貴人事忙，由朝到晚都要開會，開會期間不斷收到短訊，搞到佢老人家都冇乜心機開嚟睇，索性叫人call番佢算數。八方有個小提議畀卿姐，就係電話同call機一樣可以轉震機，咁第時開會就毋懼被短訊轟炸，況且用WhatsApp發短訊唔使錢，卿姐咁精打細算，咪當做好心幫對方慳錢囉。