聯盟公佈咗下季季前熱身賽，中國站會係邊兩隊打啦！亞洲球迷可以話超級好彩，因為兩支話題球隊湖人同火箭，將會喺10月嚟中國獻技。又可以見到湖人嘅拜恩同火箭華人之光林書豪，真係講起已經覺得爽爆！
火箭班主阿歷山大，周三喺火箭作客108:114不敵熱火場波，同記者爆響口話球隊今年秋天會去打中國賽，將會係一次好正嘅體驗。仲話因為姚明，所以喺中國有好多球迷，令到球隊好期待今次中國行㖭！火箭係第一支去中國打季前賽嘅球隊，04年有姚明同麥基迪嘅侯斯頓，當年對手係帝王。10周年紀念賽對另一支大陸風頭躉湖人，聯盟今次實賺到笑。
講起湖人，佢哋近期都可以算係幾運滯。日前加素右腳受傷，以為冇乜事；點知今日有消息話佢可能因為足底筋膜炎，而要休息4至8星期，令到已經冇咗中鋒懷特侯活嘅「洛城1哥」內線真空。搞到拜恩叫「超人」唔好理傳媒同球迷批評，帶傷上陣比賽。不過，懷特侯活睬你都儍。即管睇吓今日對綠軍，佢會唔會披甲喇！（now635台今日9:00am直播）