《樂》
阿根廷球王美斯喺巴塞隆拿贏盡一切錦標，幾乎打破晒可以破嘅紀錄，難得嘅係佢一直都對巴塞咁忠心不二，從來冇半句暗示過要走人。巴塞球會亦都識做，官方宣佈會喺日內，以天價年薪同美斯續約。球會透過官網話會喺周四同美斯續約，新約會去到2018年，到時美斯都已經31歲。據講啱啱做咗《君子》雜誌3月號封面人物嘅美斯續約之後，年薪會加到除稅後1,600萬歐元（約1.6億港元），當今世上所有足球員，就只有佢前隊友伊度奧有更高人工。論表現同功績，我求大俠就覺得美斯收過億半港紙一年絕對值得多，你睇伊度奧去到安治之後，有幾多實際貢獻呢。另外，最近有份統計報告指出，全世界有32.9%球迷會關注美斯，關注C朗就輸少少，得30.6%；至於排第3嘅就係曼聯嘅朗尼，有19.6%。